Taiwo Kolawole

Taiwo Musbau Kolawole (an haife shi a ranar 18 ga watan Yuli 1961) ɗan siyasan Najeriya ne, shugaba kuma masanin kididdiga wanda aka zaɓa a matsayin ɗan majalisar wakilai ta tarayya a majalisar wakilai ta Najeriya ta 9 mai wakiltar mazaɓar Ajeromi/Ifelodun tun daga shekarar 2019. Ɗan jam’iyyar All Progressives Congress (APC), Kolawole ya samu kuri’u 36,115 inda ya doke ‘yar takarar jam’iyyar Peoples Democratic Party (PDP), Misis Rita Orji, wacce ta samu kuri’u 32,557 a karin zaɓe a babban zaɓen Najeriya na shekarar 2019.

Taiwo Kolawole
mamba a majalisar wakilai ta Najeriya, 11 ga Yuni, 2019 - District: Ajeromi/Ifelodun
Rayuwa
Haihuwa	Lagos Island, 18 ga Yuli, 1961 (63 shekaru)
ƙasa	Najeriya
Karatu
Makaranta	Kwalejin kimiyya da fasaha ta tarayya Bida Jami'ar Ilorin Jami'ar Ibadan
Sana'a
Sana'a	ɗan siyasa

Rayuwar farko, ilimi da aiki

An haifi Kolawole a tsibirin Legas amma ya girma a Amukoko, Ajegunle, Jihar Legas. Iyayensa sun kasance marigayi Alhaji (Cif) Kolawole Tiamiyu Ojuolape da Cif (Mrs.) Kolawole Simbiat Asake (Nee Ajayi). Ya halarci makarantar WJ David Memorial Baptist, Legas Island, Legas don karatun firamare daga shekarun 1970 zuwa 1976, sannan ya wuce St. Charles Grammar School, Osogbo, Jihar Osun don yin karatunsa na sakandare daga shekarun 1979 zuwa 1984. Daga nan sai Kolawole ya shiga Federal Polytechnic, Bida a Jihar Neja daga shekarun 1986 zuwa 1988 inda ya samu Diploma na ƙasa (OND) a fannin kididdiga. Bayan haka, ya ci gaba da karatun digiri na farko a fannin kididdiga a Jami'ar Ilorin.

Bayan ya kammala shirinsa na bautar ƙasa (NYSC), Kolawole ya ci gaba da karatunsa kuma ya sami digiri na M.Sc. digiri a Kididdiga daga Jami'ar Ibadan a shekarar 1994. Ya fara aikinsa a shekarar 2001 a Kolad Concept Limited, sannan kuma ya samu gogewar aiki a Tripple G Plc, Abule-Osun, Legas kafin ya shiga harkokin siyasa.

Aikin siyasa

Kolawole ya fara aikinsa na siyasa a matakin farko a cikin shekara ta 1999 a matsayin memba na Social Democratic Party (SDP), sannan ya shiga Grassroots Democratic Movement (GDM) da, Alliance for Democracy (AD). Ya kasance ɗaya daga cikin ‘yan majalisar dokokin jihar Legas da suka daɗe da zama a majalisar dokokin jihar. Ya kasance a majalisar dokokin Legas daga majalisa ta 4 zuwa ta 7 (1999-2015). An zaɓe shi a matsayin shugaban masu rinjaye a majalisar dokoki ta 6 a shekarar 2007 sannan kuma aka zaɓe shi a matsayin mataimakin shugaban majalisa a lokacin majalisar dokoki ta 7 a shekarar 2011. Kolawole ya riƙe muƙaman shugabanci daban-daban a majalisar dokokin jihar Legas. Ya taɓa rike muƙamin Shugaban kwamitoci daban-daban kamar Otal-otal da yawon bude ido, hidimomin gidaje, Kimiyya da Fasaha, Ilimi, Tsare-tsaren Tattalin Arziki da Kasafi, da Muhalli. An sake zaɓen sa sau huɗu yana wakiltar mazaɓar ƙaramar hukumar Ajeromi-Ifelodun I. Sai dai kash, yunkurinsa na lashe wa’adi na biyar a majalisar dokokin jihar Legas bai yi nasara ba saboda ya sha kaye a hannun Bayo Famakinwa, jam’iyyar Peoples Democratic Party (PDP). Dan takarar PDP, ya kawo karshen burinsa.

A shekarar 2016, an naɗa Kolawole a matsayin shugaban bankin IBILE Micro Finance Bank, bankin da gwamnatin jihar Legas ta kirkira a lokacin gwamnatin Akinwunmi Ambode kuma babban bankin Najeriya ya ba shi lasisi don rage radadin talauci, rage rashin aikin yi, da ƙara hada-hadar kuɗi a cikin Jihar Legas. Bayan kammala zaɓen da aka gudanar a rumfuna 71 na mazaɓu takwas na mazaɓar Ajeromi-Ifelodun ta tarayya na ɗan majalisar wakilai, Kolawole ya lashe zaɓen majalisar wakilai ta ƙasa a shekarar 2019. Ya samu kuri’u 36,115 inda ya kayar da babbar abokiyar hamayyarsa Misis Rita Orji ta jam’iyyar PDP wadda ta samu kuri’u 32,557.